Oleh Pdt. Dr. Tuhoni Telaumbanua
(I)
He ya’ami ira iwa, ere, salawa hada, salawa fareta
Da’ulau mangenu modawa,
Da’utunö zi sambua gamaedola,
Hewisa lala wa’auri niha iada’a,
Ba wolawa emali samunu, sotöi Corona
Si no muzaewe ba zi sagörö ölia.
Si no mo’anöröi danö Indonesia.
No sa’ae ba wawa mamini nono mbanua,
No göi mamolo ndra ere satuatua,
No oi fao ndra bohalima solohe föda,
Ba wolohi tungö, emali samunu niha.
Ba lö te’ala, lö alau ba gu’ö fama’ala,
Ba lö mate, hewa’ae lahawui disinfektan,
Ba lö alele ba zino siriri sihandro ölia.
Hewa’ae no mamagölö ndra ere, awö ndra salawa,
Hewa’ae no mu’o’ö wanuturu lala soroi wamatera,
No oi mubalugö mbawa faoma nukha sola’a,
No oi musasai danga, fa lö manuge Corona,
No oi mutaha dödö, lö orahu, lö fara’u tanga.
Ba lö sa’atö te’ala Corona, lö ibato wondra’u niha.
Irege hönö niha no göna, hönö soi oi te’ala.
Andrö usekhögö khögu dödö, ufasui era’era,
Usofu, hana wa te’ala ndra salawa sagatuatua,
Hana wa oleda ndra segebua fetaro, salawa faka
Hana wa alele ndra segebua ana’a, soya okhöta,
Hana lö lasöndra döröu, famunu biso Corona,
Hana lö lara’u lafa’ala, dungö samunu niha,
Hana lö lafufu ba danö dungö si’ite, si lö faoro zikhala?
(II)
Usofu khö zihai uwu zi hönö, usofu khö gere sifahöna eheha
Hana wa lö lalalala dödö, hana wa tebai mufa’ala,
Hadia danömö wökhö, hadia zitobali tandrawa,
Hadia gumbu wa’erao, hadia dabitabi fanaha,
Hana watebai mufufu ba mugögötö nemali samakao niha,
Hana watebai mukhozi, muse’e ba danö ölia?
Ba mamene ndra ere salawa era’era,
Lamane: “da’uhalö börö dumaduma, utunö ba gamaedola,
Me ato zi hulö Gola, labe’ nasio – oi lö falemba,
Me ato zi hulö mbulu dalö, labe’ nidanö oi lö tetaha,
Oi agabe’e dandro, lö la’o’ö wanuturu lala,
Oi abe’e högö, lö khöra famangelama.
Hadia’i nifalaua nono wobanuasa ?
Oi fatahitahi, labe’e ba hulu zalawa,
Oi ladöni gahe nawöra, si so ba nora tanö yawa,
Oi fönu falelesa, zagalua ba mbewera,
Oi ‘tolotolo” nifa’uke ba nifa’uka dödöra,
Ba lö sa ibe’e dödöra wanimbagö tungö Corona.
Mamene zalawa fareta, mamene tuhenöri solohe tanga,
Böi orudu orahu ua sabata nono mbanua,
Böi angawuli ba mbanua, ba nomo zatua,
Iagö manö danö wekoli ua gasagasa,
Ena’ö böi muzawili teboloso dungö Corona
Solohe ba wa’amate, fa’ate’ala.
Ba lö molo’ö nono wobanuasa,
Oi fatandro niha soya,
Mamaito, lö la’o’ö gamakhoita zalawa,
Mamadaö, lalawa ba labözi ndra dubala,
Lasawö goroisa zatua, la’osiwawöi gamakhoita mbanua,
Irege, tobali ira samazaewe tungö Corona.
Andrö lafazawa danga ira doto awö perawat,
Me ambö ölöra wanolo si no i’usu tungö Corona,
Tenga mo’alöta, hewa’ae no so PSBB si no ifakhoi salawa,
Tedou, monönö wa’oya zi no göna tungö sama’ala,
Andrö mowengu, me’e dödö ndra salawa fareta,
Andrö lamane ira doto – perawat: “Terserah Indonesia”.
(III)
Fa’alai khögu dödö, fa’alai khögu mbo ira iwa,
Alai na hulö Gadamo faoma Khawa samadaö wolawa So’aya,
Alai na hulö Zodoma ba Gomora,
Nifakiko faoma alitö balera
me lö famalalini era’era.
Me samösa lö sangata’ufi Yehowa.
Andrö faböi adudu nomo orudua, sotöi Indonesia,
Ena’ö böi itörö lofo nono wobanuasa,
Ena’ö böi mangarö, ba böi me’e lakha mbanua,
Ena’ö böi mangenu dödö zi lö ama si lö ina,
Ba na no ganuli, lafuli ba gabörö, iwa’ö ba gamaedola föna,
Niwuwu mba’uba’u, nifoe gondrekhata, nifuli ba mböwö föna.
Ba hiza data’anofuli, datalau fa’era,
Hadia mböwö si sökhi nifalua,
Me tenga simane föna fatua lö so Corona,
Niwu’ai lala wa’auri, nibohouni dödö era’era,
Me no so ita ba gotalua dungö sama’ala,
Me no ifasui ita tanömö gamatela.
Andrö datatöngöni menemene zalawa fareta,
Wa tafuli ita ba lala halöwö, ba lala wa’aurida zamösana,
Sifao fangelama ba nemali solohe amatela.
Si no amaedola ulö sandruta, i’alui haniha nidounia.
Andrö databali’ö amakhoita sibohou muraka,
Si no amaedola fanuturu lala.
(IV)
He ya’ita ono wabanuasa,
Tatohugö halöwöda si fao fangelama,
Tasasai danga, tödö ba era’era,
Tasasai danga, böi fatögi böi fafera,
Tasasai danga, böi tema’ö zölösölö fama’ala,
Tasasai danga, böi babaya zitobali lakhalakha.
He ya’ita ono wabanuasa,
Data’osindruhugö wangenanö wangai halöwöda,
Balugö mbawa fa lö tofakha Corona,
Balugö mbawa fa lö alua wa’asilöyawa,
Balugö mbawa fa lö arörö ba zihufa,
Balugö mbawa fa lö falele mango’aya.
He ya’ita banua Zo’aya,
Datafalua wamohouni ba lala wasumangeta,
Ba böi olifu wa no i’o’ö’o’ö ita tungö sama’ala.
Andrö böi tarörö ita ba hufahufa,
Tabohouni lala wariawösada,
Tafosumange nawöda, hewa’ae lö fara’u tanga.
Talau manunö ba wanuno So’aya,
Tenga fanunö ba wangalui lakhömida.
He ya’ita banua Zo’aya,
Datafalua wamohouni ba lala wariawösada
Datafalua wamohouni ba lala wahasambuada.
Ta’osara’ö dödö, ta’onoro noro dödö nawöda,
Me nifaluada ba wondrege zinumana,
Ba no khö Zo’aya tafalua.
He ya’ita banua Zo’aya,
Databohouni lala wangerangera ba nifotöi Gereja
Oi moguna sa domosa, nahia wamalua fasumangeta,
Bahiza böi olifu wa “Gereja adalah Orangnya”.
Andrö datafaeri ‘niha’ khilikhili Yehowa,
Ena’ö fa’ohahau dödö zifalukha,
I’olohuni howuhowu Zo’aya.
YA’AHOWU FEFU!
